(இதற்கு முன்…)

அப்போலோ திட்டத்தின் மூலமாக நிலவுக்கு சென்று வந்தவர்கள் 24 பேர். அதில் 12 பேர் நிலவில் இறங்கி தடம் பதித்துள்ளனர். 12 பேர் நிலா வரை சென்று, ஆனால் அதைத் தொடாமல், திரும்பி வந்துள்ளனர்.

ஒவ்வொரு அப்போலோ பயணத்திலும் மூன்று வீரர்கள் இருப்பார்கள். இருவர் லூனார் மாட்யூல்’இல் கிளம்பிச் சென்று நிலவில் இறங்கி ஆராய்ச்சிக்காக கல்லையும் மண்ணையும் பொறுக்கிக்கொண்டிருப்பார்கள். ஒரு வீரர் இவர்கள் திரும்பி வரும் வரை கமாண்ட் மாட்யூல்’இல் நிலவை சுற்றி வந்துகொண்டிருப்பார்.

அப்போலோ 13’இன் பாதிக்கப்பட்ட சர்வீஸ் மாட்யூல்
(கழற்றி விடப்பட்ட பிறகு எடுக்கப்பட்ட புகைப்படம்)

அப்போலோ 8, 10 மற்றும் 13 பயணங்களில் மூன்று மூன்று பேர் நிலவை சுற்றி வந்தனர். அப்போலோ 11, 12, 14, 15, 16 மற்றும் 17 பயணங்களில் ஒருவர் நிலவை சுற்றி வர, இருவர் நிலவில் இறங்கினர் (பெருக்கினால் 27 வருதேன்னு கணக்கு பண்ணாதீங்க. சில வீரர்கள் ஒன்றுக்கு மேற்பட்ட பயணங்களில் ஈடுபட்டிருந்தனர்). அப்போலோ 13 பயணத்திலும் இரண்டு வீரர்கள் நிலவில் இறங்கியிருக்க வேண்டியது. ஆனால், துரதிர்ஷ்டவசமாக ஆக்ஸிஜன் டேங்க் வெடித்ததால், சர்வீஸ் மாட்யூல் பழுதடைந்து வீரர்கள் பத்திரமாக பூமிக்கு திரும்பி வந்ததே பெரும்பாடாகிவிட்டது.

ஒரு டஜன் பேருக்கு மேல் நிலவில் இறங்கியிருந்தாலும் நமக்கு ஞாபகம் இருப்பதென்னவோ நீல் ஆர்ம்ஸ்ட்ராங் தான். நிலவில் இறங்கும் போட்டி அமெரிக்கா மற்றும் ரஷ்யா’வுக்கு இடையே மட்டுமல்ல, தயாராகிக்கொண்டிருந்த அப்போலோ வீரர்களுக்கிடையேயும் கூட இருந்தது என்று சொல்லலாம். ஏனெனில், நிலவில் முதல் தடம் எடுத்து வைப்பவர் சரித்திரத்தில் இடம்பெறப் போகிறார் என்பது அனைவரும் அறிந்தது. நிலவுக்கான முதல் பயணத்தில் சென்றாலும், நிலவில் முதல் காலடி எடுத்து வைத்தது நீல் ஆர்ம்ஸ்ட்ராங்’தானே தவிர தானல்ல என்ற வருத்தம் வாழ்நாள் முழுவதும் பஸ் ஆல்ட்ரின்’க்கு இருந்தது.

அது சரி, முந்தைய அப்போலோ வீரர்கள் நிலவில் இறங்க முயற்சிக்கவில்லையா?

முதல் காலடி வைத்து
நிலவில் இருந்து திரும்பிய பிறகு
லூனார் மாட்யூல்’இல் ஆர்ம்ஸ்ட்ராங்
(செல்ஃபி அல்ல, ஆல்ட்ரின் எடுத்தது)
21 ஜூலை 1969

நிலவில் இறங்குவது மட்டுமல்ல, அதற்கான பயற்சியும் சவாலாகத்தான் இருந்தது. அப்போலோ 11 ஏவலுக்கு பிறகு டேக் ஸ்லேடன், “அப்போலோ 11’க்கான பயற்சியில் மிகச் சவாலானதாக நான் உணர்ந்தது நிலவில் இறங்குவதற்கான பயற்சியை வீரர்களுக்கு அளிப்பதுதான். மற்றவைகள் எல்லாம் – பூமி/நிலவை சுற்றி வருதல், ஈர்ப்பற்ற தன்மை (அல்லது ஜீரோ-G), விண்வெளியில் ஓடத்தின் வெளியில் சென்று வருதல் – ஏற்கனவே மீண்டும் மீண்டும் முயற்சித்துப் பார்க்கப்பட்டிருந்தது. அப்போலோ 7’இல் கமாண்ட் மாட்யூல் முயற்சித்துப் பார்க்கப்பட்டது. அப்போலோ 9 வீர்கள் லூனார் மாட்யூல்’யை தங்கள் பயணத்தின் போது உபயோகித்தனர். அப்போலோ 8 நிலவுக்கு சென்று திரும்பியது. அப்போலோ 10, நிலவைச் சுற்றி வந்தது. அதுவரை நாங்கள் செய்யவே செய்யாத ஒன்று உண்டென்றால் அது நிலவில் மனிதனை இறக்குவதுதான். அதற்கான பயற்சியை வீர்களுக்கு அளித்தது எங்களுக்கே ஒரு புது அனுபவம்.” இதில் மேலும் சிக்கல் என்னவென்றால், சீட்டுக் கட்டு போல் அப்போலோ 7, 8, 9, 10 என்று ஏவல்களை நாசா வரிசையாக நெருக்கி அடுக்கியிருந்தது. அப்போலோ 11 வீரர்களுக்கே (நீல் ஆர்ம்ஸ்ட்ராங் மற்றும் பஸ் ஆல்ட்ரின்) கூட லூனார் மாட்யூல் ஸிமுலேட்டரில் பயற்சி பெற வாய்ப்பு கிடைத்தது மே 1969’இல் தான். அதாவது, தங்கள் அப்போலோ 11 ஏவலுக்கு இரண்டு மாதங்கள் முன்புதான். ஏனென்றால், அதுவரை அப்போலோ 10 வீரர்கள் அந்த லூனார் மாட்யூல் ஸிமுலேட்டரில் பயற்சி எடுத்துக் கொண்டிருந்தார்கள்.

கடைசி காலடி பதித்து
நிலவில் இருந்து திரும்பிய பிறகு
லூனார் மாட்யூல்’இல் செர்னன்

அப்போலோ 10 உண்மையிலேயே மிக விரிவான முயற்சியாக இருந்தது. அப்போலோ 8’இல் நிலவை நெருங்கிப்போய் கிட்டத்தட்ட தொட்டுவிட்டு வந்தாகி விட்டது. இனிமேலும் காத்திருக்கத் தேவையில்லை, அப்போலோ 10’ஐ நிலவில் இறக்கிவிடலாம் சிலர் உறுதியாக எண்ணினார். (அப்போலோ 10 வீரர்களும் இதை வெகுவாக ஆமோதித்தனர்.) ஒரே ஒரு பிரச்சனை என்னவென்றால், நிலவில் இறங்கிவிட்டால், மீண்டும் மேலே எழும்பும் அளவுக்கு இலகுவானதொரு எடையற்ற ஒரு லூனார் மாட்யூல்’ஐ நாசா பொறியாளர்கள் அப்பொழுது தயாரித்திருக்கவில்லை. இறங்கினால் இறங்கியதுதான். நிலவின் ஈர்ப்பு விசையை எதிர்த்து மீண்டும் லூனார் மாட்யூல் மேல் எழும்பாது. மனிதனை நிலவில் இறக்குவது அதிபர் கென்னடியின் கனவல்ல; அப்படி இறக்கி, மேலும் பத்திரமாக மனிதனை பூமிக்கு திரும்ப அழைத்து வருவதே அவர் கனவு.

“எங்களைப் பற்றி பலர் நன்கு அறிந்து வைத்திருந்தனர். ‘இவனுங்களுக்கு நிலாவுல இறங்க ச்சான்ஸ் கொடுத்துடாதீங்க. ஏன்னா, வாய்ப்பு கெடைச்சா டக்குன்னு இறங்கிருவாங்க. பீ கேர்ஃபுல்,’ என்று எங்கள் பின்னால் சொன்னவர்கள் பலர்.” சிரித்தபடி சொல்கிறார் அப்போலோ 10’இன் ஜீன் செர்னன் (Gene Cernan), “அதனால், நிலவில் இருந்து மேல் எழும்பப் பயன்படும் வாகனத்தில் பாதியளவுதான் எரிவாயு நிரப்பியிருந்தார்கள். டேங்க் ஃபுல் பண்ணவில்லை. தப்பித் தவறி, ஆர்வக் கோளாறில் நாங்கள் நிலவில் இறங்கியிருந்தாலும்கூட மீண்டும் மேல் எழும்பியிருக்க முடியாது. அப்படியே, அந்த வடை சுடும் பாட்டியுடன் இருந்திருக்க வேண்டியதுதான்.” ஒரு முரண் பாருங்கள் – நிலவில் முதல் தடம் பதிக்க முடியாவிட்டாலும், இன்றைய தேதிக்கு இவர்தான் நிலவில் கடைசியாக காலடி வைத்த மனிதர்.

எது எப்படியோ, அப்போலோ 11’இன் நீல் ஆர்ம்ஸ்ட்ராங்’க்கே நம்ம வடைப் பாட்டியை சந்தித்து கை குலுக்கும் முதல் வாய்ப்பு கிடைத்தது.

ஆர்ம்ஸ்ட்ராங்,
மனிதன் நிலவில் காலடி வைப்பதற்கு ஓரிரு நிமிடங்கள் முன்பு.
(தொடர்ந்து…)

“All are equal; but some are more equal”

யாராவது தன் அமைப்பில் தனக்கு இழைக்கப்படும் அநீதியைப் பற்றி என்னிடம் புலம்பும்போது நான் உதிரும் முத்துக்கள் இவை. எப்படி என் மனதில் இது பதிந்தது அல்லது எங்கு படித்தேன் என்று எனக்கே நினைவில்லை. ஆனாலும் சொல்லிக்கொண்டிருந்தேன் – “அனைவரும் சமம்; சிலர் சற்று கூடுதலாகவே சமம்”.
சென்ற திங்கட்கிழமை மும்பை சத்ரபதி சிவாஜி டெர்மினஸ் (CST) என்று தற்போது அழைக்கப்படும் விக்டோரியா டெர்மினஸ் (VT) சென்றிருந்தேன். அங்கு ரயில்வே ஸ்டேஷன்’இல் இருக்கும் புத்தகக் கடையில் கிட்டத்தட்ட அனைத்து வார இதழ்களும் கிடைக்கும். இந்தியா டுடே, ஜூவி, ஆவி வாங்கிய பிறகு புத்தகங்களின் மேல் கண்கள் அலைந்த போது தென்பட்டது ‘Animal Farm by George Orwell’. தலைப்பும் ஆசிரியரும் யாரோ சொல்லக்கேட்ட அல்லது படித்த மாதிரியே தோன்றியது. கையில் வாங்கிப் பார்த்த போது, அட்டையில் இருந்த வரிகள் என்னைத் தாக்கியது.

ALL ANIMALS ARE EQUAL.
BUT SOME ANIMALS ARE
MORE EQUAL THAN OTHERS.

சத்தம் போடாமல், உள்ளே மேலும் ஆராயாமல், பேரம் பேசாமல் உடனே வாங்கினேன். லோக்கலில் வீட்டுக்கு திரும்பும்போதே பெயரெழுதி படிக்க ஆரம்பித்தேன். 120 பக்கங்களில், 99 ரூபாயில் கைக்கடக்கமான புத்தகம்.

ஜார்ஜ் ஆர்வெல்

ஜார்ஜ் ஆர்வெல் (George Orwell) என்ற புனைப்பெயரில் எழுதிய எரிக் ஆர்தர் ப்ளேர் (Eric Arthur Blair) 1903’ஆம் ஆண்டு நம்ம இந்தியாவின் பீஹார்’இல் பிறந்தார். அவர் தந்தை அரசு அலுவலர். அன்றைய பிரிட்டிஷ் அரசு நடத்திய அங்கீகரிக்கப்பட்ட அபின் வர்த்தகத் துறையில் பணியாற்றிக் கொண்டிருந்தார். ஆர்வெல் தனது ஒரு வயதில் லண்டன் அனுப்பப் பட்டார். பள்ளிப் படிப்பு அங்கேதான். ஆனாலும், அவர் அப்படியொன்றும் பெரிதாக படித்துக் கிழித்துவிடவில்லை. தனது 19’வது வயதில், இந்தியன் இம்பீரியல் போலீஸ்’இல் (Indian Imperial Police) இணைந்து பர்மா (இன்றைய மியான்மார்) சென்றார். ஏற்கனவே அவருக்கு ஏகாதிபத்திய அரசின் மீது ஒரு வெறுப்பு இருக்க, ஐந்தே வருடங்களில் அந்த வேலை அலுத்துவிட்டது. அரசு வேலையை தோளில் கிடக்கும் துண்டென துச்சமாக மதித்து துறந்து, இனிமேல் எழுத்து தான் தன் வாழ்க்கை என்று முடிவெடுத்து (என்னா துணிச்சல்!!!) 1927’இல் லண்டன் திரும்பி, அங்கிருந்து பாரிஸ் சென்றார். கதை, கட்டுரை என்று என்னென்னவோ எழுதிப் பார்த்தார். ம்ஹ்ம்ம், ஒன்றும் சோபிக்கவில்லை. பின் இந்த ‘ஜார்ஜ் ஆர்வெல்’ என்ற புனைப் பெயரில் எழுத ஆரம்பித்தார். டௌன் அண்ட் ஔட் இன் பாரிஸ் அண்ட் லண்டன் (Down and Out in Paris and London) என்பது அவர் முதல் புத்தகம். இந்த இரு தலைநகரங்களில் நிலவிய ஏழ்மையைப் பற்றிய அனுபவ மற்றும் பயணக் கட்டுரை. அனிமல் பார்ம் (Animal Farm), நைன்டீன் எய்ட்டி-போர் (Nineteen Eighty-Four) மற்றும் ஹோமேஜ் டூ கேடலோனியா (Homage to Catalonia) ஆகியவை அவரது சிறந்த படைப்புகள். 1950’இல் ஆர்வெல் இறந்த போது அவருக்கு வயது வெறும் 46. ஒரு கொசுறுத் தகவல் – இன்று நாம் வெகு பிரபலமாக உபயோகிக்கும் ‘Big Brother’ (பெரியண்ணன் என்று வேறு அதை தமிழாக்கியிருக்கிறோம்) என்ற சொல்லாடலை இவர்தான் தன் படைப்புகளில் முதன் முதலாக பயன்படுத்தினார்.

அனிமல் ஃபார்ம்

115 பக்கங்களில் மிகக் குட்டி, அட்டகாசமான மிக சிம்பிள்’ஆன ஆங்கிலம், விறுவிறுவென்று ஓடும் கதை (வர்ணனைகளா? மூச்!!!), குழப்பமில்லாத ஒரு ஃப்ளோ என்று பல வகைகளில் என்னைக் கட்டிப் போட்டது இந்த அனிமல் ஃபார்ம். மூன்று பிரிட்டிஷ் பதிப்பாளர்கள் மற்றும் இருபதுக்கும் மேற்பட்ட அமெரிக்க பதிப்பாளர்கள் நிராகரிக்க (அனைவருக்கும் பயம்) கடைசியாக 1945’ஆம் ஆண்டு பதிப்பிக்கப்பட்டது. பின் 1954’இலும் 1999’இலும் திரைப்படமாக எடுக்கப்பட்டது. நம்ம கொல்லும் (Lord of the Rings) மற்றும் ஸீசர் (Planet of the Apes) புகழ் ஆண்டி செர்கிஸ் (Andy Serkis) இயக்கத்தில் ஒரு 3-D படம் வரவிருப்பதாக 2012’இல் அறிவிப்பு வெளியானது. நூறு சிறந்த ஆங்கில நாவல்களில் ஒன்றாக இந்த புத்தகத்தை தேர்ந்தேடுத்துள்ளது டைம் பத்திரிகை. மேலும் பல சிறப்புகள் உண்டு. இப்பொழுது கதையைப் பார்க்கலாம்.

ஓபன் பண்ணா, ஒரு அழகிய பச்சைப் பசேல் பண்ணை. அதன் பண்ணையார் ஜோன்ஸ். அவன் பண்ணையில் ஆடு, மாடு, கோழி, பன்றி, குதிரை, கழுதை, வாத்து, பூனை என்று பல மிருகங்கள். வழக்கமான தமிழ் சினிமா பண்ணையார் போல மிருகங்களின் உழைப்பை சுரண்டி அதில் ஏகபோகமாக வாழ்ந்து கொண்டிருக்கிறான் இந்த ஜோன்ஸ்.

மிஸ்டர் பன்றிக்கு மற்ற டோளர்களிடையே (மற்ற அனிமல்ஸ் / மிருகங்கள்) பெருமதிப்பு இருக்கிறது. அவர் ஒரு நாள் அனைத்து டோளர்களையும் அழைத்து ஒரு கூட்டம் நடத்துகிறார். பண்ணை ஜோன்ஸ்’க்கு தெரியாமல் அவன் தூங்கிய பின்னர் தான். “டோளர்களே, I have a dream. நாம் கஷ்டப்பட்டு உழைக்க, இந்த சோம்பேறி மனிதன் சும்மா உட்கார்ந்து உண்பதா? ஐயகோ. இதில் மாற்றம் வேண்டும். நம் உழைப்பு நமக்கே. மனிதன் இல்லாத நமக்கே நமக்கான பண்ணைதான் நம் கனவு. அந்த நன்னாளை எதிர்நோக்குவோம் டோளர்களே. உடல் மண்ணுக்கு. உயிர் பண்ணைக்கு.” என்று உணர்ச்சி பொங்கப் பேசி, ஒரு விடுதலை தீயை விதைத்து, பின் ஒரு நாலு நாள் கழித்து நிம்மதியாக செத்துப் போகிறார்.

பண்ணையின் கொம்பு + குளம்பு கொடி
(கதிர் அரிவாள் + சுத்தியல் போல இல்லை???)

ஒரு மூன்று நான்கு மாதங்கள் கழித்து ஒரு உப்புப் பெறாத விஷயத்திற்காக பண்ணையில் போராட்டம் வெடிக்கிறது. ஜோன்ஸ் பண்ணையை விட்டு துரத்தப் படுகிறான். ஸ்னோபால் மற்றும் நெப்போலியன் என்ற இருண்டு பன்றிகள் பண்ணையின் பொறுப்பேற்கின்றன. மானோர் ஃபார்ம் (Manor Farm) என்றழைக்கப்பட்ட பண்ணை அனிமல் ஃபார்ம் (Animal Farm) என்ற புது பெயர் பெறுகிறது. டோளர்கள் தங்கள் வெற்றியை, சுதந்திரத்தை கொண்டாடுகிறார்கள். பீஸ்ட்ஸ் ஆஃப் இங்லாண்ட் (Beasts of England) என்ற அவர்களுடைய விடுதலை கீதத்தை பாடுகிறார்கள். தங்களுக்கென ஒரு கொடியை அமைத்துக் கொள்கிறார்கள். அந்தக் கொடியில் கொம்பு மற்றும் கால் குளம்பும் பொறிக்கப் பட்டிருக்கிறது. ஒவ்வொருவருக்குமான வேலை, வேலை நேரம், ஓய்வுக்கான வயது வரம்பு (Retirement age), ஓய்வூதியம் என பல விஷயங்கள் நிர்ணயிக்கிறார்கள். அனைத்து விஷயங்களும் கூட்டத்தில் விவாதிக்கப்பட்டு வோட்டேடுப்பின் மூலமே முடிவெடுக்கப் படுகிறது. மேலும், அனைவருக்குமான ஏழு பண்ணை விதிகள் விதிக்கப் படுகிறது. அவையாவன,

1. இரு கால்களில் நடப்பவை எதிரி
2. நான்கு கால்களில் நடப்பவை, அல்லது இறக்கைகள் கொண்டவை, நண்பன்
3. யாரும் உடை உடுத்தக் கூடாது
4. யாரும் படுக்கையில் படுக்கக் கூடாது
5. யாரும் மது அருந்தக் கூடாது
6. யாரும் மற்றொருவரைக் கொல்லக் கூடாது
7. அனைவரும் சமம்

தங்கள் உழைப்பின் பயனை டோளர்கள் தாங்களே அனுபவிக்கிறார்கள். அனைவரும் தங்களின் அதிகபட்ச உழைப்பை அளிக்கிறார்கள். உற்பத்தியும் அட்டகாசமாக இருக்கிறது. இடையே, ஒரு முறை, தனது இழந்த பண்ணையை மீட்க வரும் ஜோன்ஸ்’ஐ நம் டோளர்கள் அனைவரும் சேர்ந்து விரட்டியடிக்கிறார்கள். அந்த வெற்றியை நம் டோளர்கள் ஆடிப் பாடிக் கொண்டாடுகிறார்கள் – போராட்டத்தின் போது இறந்த ஒரு ஆட்டிற்கு துக்கம் அனுஷ்டித்தும், இந்தப் போராட்டத்தில் கலந்து கொள்ளாமல் நைஸாக தப்பித்தவர்களைப் பற்றி அதிகம் கண்டு கொள்ளாமலும்.

காலம் செல்லச் செல்ல, ஒரு ஆட்சிக்கான அனைத்து மாற்றங்களும் அரங்கேறுகின்றன. ஸ்னோபால் மற்றும் நெப்போலியன் இருவருக்கிடையே பதவிப் போட்டி நடைபெறுகிறது. ஸ்னோபால் மற்ற டோளர்களுக்கு எழுதப் படிக்க சொல்லித் தருகிறது. அந்த சமயத்தில் நெப்போலியன் நாய்களை வளர்த்து தயார்படுத்தி பழக்கி வைத்திருந்து ஒரு நாள் ஸ்னோபால்’ஐ விரட்டியடித்து தலைமை ஏற்கிறது. பின் பண்ணையில் இன்னும் வேகமாக மாற்றங்கள் வருகின்றன. உழைப்பவை மேலும் உழைக்கின்றன. சொகுசுப் பார்ட்டிகள் மேலும் வசதிகளை அனுபவிக்கின்றன. குதிரை உழைத்து உழைத்து ஓடாய்த் தேய்ந்து கடைசியில் கசாப்புக்கு விற்கப்படுகிறது. கோழி முட்டைகள் விற்கப்படுகின்றன. மாட்டில் பால் அதன் கன்றிடமிருந்து பறிக்கப்பட்டு பன்றிகள் எடுத்துக் கொள்கின்றன. ஆப்பிள் முதலிய விளைச்சல் பன்றிகளுக்கு செல்கிறது. தலைமை பன்றிகளும், அவர்களைப் பாதுகாக்கும் நாய்களும் பண்ணையில் ஆட்சி செய்கின்றன. மற்ற மிருகங்களின் உழைப்பில் உறிஞ்சி வாழ்கின்றன. அவர்களின் வசதிக்கேற்ப மூன்று விதிகள் மேம்படுத்தப் படுகின்றன.
4. யாரும் படுக்கையில் போர்வையுடன் படுக்கக் கூடாது
5. யாரும் அளவுக்கதிகமாக மது அருந்தக் கூடாது
6. யாரும் காரணமின்றி மற்றொருவரைக் கொல்லக் கூடாது
ஒரு கட்டத்தில் முக்கிய விதியே திருத்தியமைக்கப்படுகிறது.
7. அனைவரும் சமம்; சிலர் சற்று கூடுதலாகவே சமம்
டோளர்களின் கீதம் நிறுத்தப்பட்டு நெப்போலியன் துதிப் பாடல் பாடப் படுகிறது. பழைய கொடி போய் வெறும் பச்சை நிறக் கொடி அமல் படுத்தப்படுகிறது. சிறுக சிறுக தலைமைப் பன்றிகள் மனிதர்களாகவே மாறி, முந்தைய ஜோன்ஸ் ஆட்சியைப் போலவே, மற்ற மிருகங்களையும் பண்ணையையும் நிர்வாகிப்பதாக கதை முடிகிறது.
இந்த கதையைப் படித்து முடித்த போது ஒரு சோகமே நிலவியது. இந்தக் கதையை இன்றைய அரசியலுடனோ அல்லது ஒரு நிறுவனத்துடனோ ஒப்பிடாமல் இருக்கவே முடியவில்லை. யோசித்துப் பாருங்கள். ஒரு கட்சியில் தலைவனுக்கும் தொண்டனுக்குமான தொடர்பு எப்படி இருக்கிறது. ஒரு நிறுவன தலைவருக்கும் அதன் கடைநிலை தொழிலாளிக்கான தொடர்பு எப்படி இருக்கிறது. இந்த நாவலில் உள்ள அரசியலை, ஒவ்வொரு மிருகத்தின் ஒவ்வொரு செயலிலும் உள்ள அரசியலை உணராமல் கடந்து போகவே முடியாது. படிக்கும் ஒவ்வொருவரும் தன்னை இந்த கதாப்பாதிரங்களில் ஏதாவது ஒன்றாக உருவகப் படுத்தாமல் இருக்கவும் முடியாது.
படிக்கவும். கண்டிப்பாக படிக்கவும். உங்கள் நூலகத்தில் பாதுகாத்து வைத்திருந்து மீண்டும் மீண்டும் படிக்கவும்.

(இதற்கு முன்…)

ஜூன் 12, 1969. மதியம் 12:30.

ஏவல் ஆணைக்குக் காத்திருக்கும் ராக்கெட்

அப்போலோ 11 – சாட்டர்ன் V ஏவுதளத்தில் நிலை கொண்டு 23 நாட்கள் ஆகிவிட்டிருந்தது.

அப்போலோவின் திட்ட இயக்குனர் லெப்டினன்ட் ஜெனரல் ஸாமுவேல் ஸி. பிலிப்ஸ் (Lt. Gen. Samuel C. Phillips), வாஷிங்டன் D.C.’யில் அமைந்துள்ள நாசா’வின் தலைமையகத்தில் ஒரு உயர்மட்ட சந்திப்புக்கு ஏற்பாடு செய்திருந்தார். ஒரு டஜன் நிர்வாகிகள் அந்த அறையில் குழுமியிருந்தனர். மேலும், நாடெங்கிலுமிருந்து இரண்டு டஜன் நிர்வாகிகள் டெலிபோன் மூலம் இணைக்கப்பட்டிருந்தனர். மட்டுமல்லாது, பல முக்கிய பெரிய நிறுவனங்களின் (McDonnell Douglas, GE, AC Electronics, MIT, IBM, Boeing, Martin Marietta, North Americal Rockwell, Philco-Ford, Chrysler, United Aircraft, மற்றும் Grumman) பிரதிநிதிகள் நடக்கவிருந்த உரையாடலைக் கேட்க ஆவலுடன் காத்திருந்தனர். இந்த சந்திப்பில் இரண்டு கேள்விகள் விவாதிக்கப்பட இருந்தது: ஜூலை மாதத்தில் அப்போலோ 11 விண்ணில் செலுத்தப்படுமா? அவ்வாறு செலுத்தப்பட்டால், அது நிலவில் மனிதனை இறக்க முயற்சிக்குமா?

இது ஒரு மிக முக்கியமான விவாதம். ஏனெனில் ஏவப்படும் நாளன்று வானம் மேகமூட்டமில்லாமல் இருக்க வேண்டும். நிலவு நமக்கு அருகில் இருக்க வேண்டும். வானிலை, தட்பவெப்பம் ஆகியவை சரியாக இருக்க வேண்டும். அனைவரும் தாயாராக இருக்க வேண்டும். அனைத்தும் ஒருங்கிணைந்து ஒரு சாதகமான நிலையில் இருக்க வேண்டும். முக்கியமாக, நாள் நட்சத்திரம் நன்றாக இருக்க வேண்டும். எல்லாம் தயாரான பின்பு இந்த கடைசி கட்டத்தில் சொதப்பிவிடக் கூடாதல்லவா.

ஜெனரல் ஸாம் பிலிப்ஸ், “முதலில் ஹண்ட்ஸ்வில்லே’வில் (Huntsville) இருக்கும் லீ ஜேம்ஸ் (Lee James) ராக்கெட்’இன் தயார் நிலை பற்றிக் கூறட்டும். இரண்டாவதாக, ராக்கெட்’இன் பாகங்கள் பற்றியும் வேறு ஏதேனும் பிரச்சனைகள் இருந்தால் அதைப் பற்றியும் ஜார்ஜ் லோ (George Low) கூறட்டும். மூன்றாவதாக கேப்’இல் (Cape) இருக்கும் ரோக்கோ பெட்ரோன் (Rocco Petrone) ராக்கெட் ஏவல் பணிகள் எந்த அளவிற்கு தயாராக உள்ளது என்பதைப் பற்றியும், பின் ஜீன் க்ரான்ஸ் (Gene Kranz) பயணத்தின் தயார் நிலை பற்றியும், இறுதியாக கேப்’இல் (Cape) இருக்கும் டேக் ஸ்லேய்டன் (Deke Slayton) நமது விண்வெளி வீரர்கள் பற்றியும் அவர்களது பயற்சி பற்றியும் கூறட்டும்.”

சாட்டர்ன் V மேலாளர் லீ ஜேம்ஸ், “இன்று காலை எட்டு மணிக்கு நாங்கள் ஒவ்வொரு குழுவாக சந்தித்து பேசினோம். முந்திய பயணங்களில் கிடைத்த அனுபவங்களால் நாம் ஒரு நல்ல நிலையிலேயே இருப்பதாக உணர்கிறோம். என்னைப் பொறுத்த வரையில் இந்த ஜூலை தேதி எங்களுக்கு ஓகே. ஆகஸ்ட் மாதத்திற்கு ஒத்தி வைக்கப் பட்டால் தான் ஏதாவது ஒன்றிரண்டு பிரச்சனைகள் புதிதாக முளைக்கலாம்.”

மனித வெண்வெளி திட்ட மேலாளர் ஜார்ஜ் லோ, “நிலைமை கட்டுக்குள் இருக்கிறது. இதே மாதிரி இருந்து விட்டால் எங்களுக்கு சந்தோஷமே. நாங்கள் இதுவரை ஏகப்பட்ட மீட்டிங் நடத்திவிட்டோம். இருந்தும் அப்போலோ 10’இல் ஏற்பட்ட அத்தனை முரண்பாடுகளையும் எங்களால் புரிந்துகொள்ள முடியவில்லை. CSM மற்றும் LM (Command/Service Module மற்றும் Lunar Module) ஆகியவற்றின் தயார்நிலையைப் பொருத்தவரையில், அப்போலோ 10 ஏவப்படுவதற்கு 1 மாதத்திற்கு மும்பு நாம் இருந்த நிலையைவிட இப்பொழுது அப்போலோ 11’க்கு நல்ல நிலையில் இருக்கிறோம். முந்தைய அப்போலோ 10 முயற்சியில், LM’ஐ நிலவில் இறக்கிய போது அதன் வெப்ப பாதுகாப்பான்கள் (thermal protection) உரிக்கப்பட்டதல்லவா, அதைப் பற்றி ஆராய்ந்து கொண்டிருக்கிறோம். இன்னும் சரியாக காரணம் பிடிபடவில்லை. இருந்தும் அடுத்த மாதம் அப்போலோ 11’ஐ விண்ணில் ஏவ முடிவு செய்யப்பட்டால் நாங்கள் தயாராகவே இருக்கிறோம்.”

பிலிப்ஸ், “இதுவரை சேகரிக்கப்பட்ட தகவல்களில் இருந்து என்ன தோன்றுகிறது?”

லோ, “புதிதாக ஒன்றும் இல்லை. இருக்கும் அத்தனை தகவல்களையும் புரட்டி எடுத்துக் கொண்டிருக்கிறோம். வயரிங்’இல் ஏற்பட்ட குழப்பமோ அல்லது ஒரு சிறு தவறோ காரணமாக இருக்கலாம் என்று யூகிக்கிறோம்.”

நடந்தது இதுதான். அப்போலோ 10’இல் வெண்வெளி வீரர்கள் பயற்சியில் ஈடுபட்டிருந்தனர். அப்போலோ 11 கொண்டு மனிதனை நிலவில் இறக்குவதற்காக முன்னோடிப் பயற்சி அது. நிலவை விட்டு லூனார் மாட்யூல் (LM) மேல் எழும்பும் போது சட்டென்று நிலை தவறிவிட்டது. அனைவரும் டென்ஷன் ஆகிவிட்டனர். எந்தளவுக்கென்றால், அப்போலோ 10’இன் LM விமானி ஜீன் ஸெர்னான் (Gene Cernan) சட்டென்று படபடத்து, “ங்கோxxx… ங்கோம்xxx…” என்று வாய்விட்டு கத்தியே விட்டார். நாசா மற்றும் க்ரம்மான் பொறியாளர்கள் நூற்றுக்கணக்கான மணிநேரங்கள் செலவழித்தும் எதனால் இப்படி LM நிலை தடுமாறியது என்று கண்டுபிடிக்கவே முடியவில்லை.

லோ, “லூனார் ரிசீவிங் லெபோரேட்டரி (Lular Receiving Laboratory – LRL) கூட ஒருவழியாக தயாராகி விட்டதாக அறிகிறேன். வீரர்களின் பயிற்சியும் திருப்திகரமாக முன்னேறிக் கொண்டிருக்கிறது.” நிலவில் இருந்து கொண்டுவரப்படும் கல், பாறை, தூசு முதலியவை நம் சுற்றுச் சூழலை பாதிக்கலாம் என்ற அச்சம் இருந்ததால், அதை முதலில் இந்த லூனார் ரிசீவிங் லெபோரேட்டரி’யில் வைத்து சோதித்து பின் பாதுகாப்பாக வைக்கத் திட்டம். நிர்வாகக் குளறுபடியால், இது பயணத்தின் முன் தயாராகிவிடுமா என்ற பயம் இருந்தது. ஒரு வழியாக முடித்து விட்டார்கள்.

நிலவில் இறங்கவேண்டிய இடத்தை சுட்டிக் காட்டும் ரோக்கோ பெட்ரோன்

பெட்ரோன், “ஜார்ஜ் லோ மற்றும் லீ ஜேம்ஸ் கருத்தை நான் ஆமோதிக்கிறேன். நிலைமை ஓரளவுக்கு கட்டுக்குள்தான் உள்ளது. சொல்லப்போனால் ஒரு நாலரை நாள் உபரியாகவே உள்ளது, எங்களை நாங்கள் மேலும் தயார் படுத்திக்கொள்ள.”

தரைக் கட்டுப்பாட்டின் இயக்குனர் க்ரிஸ் க்ராப்ட் (Chris Kraft) வர முடியாத காரணத்தால், அவருக்கு பதிலாக வந்திருந்த ஜீன் க்ரான்ஸ், “நாங்களும் தயாராகவே உள்ளோம். நாளை நாம் மூன்று வீரர்களுடன் தொலைபேசி வழியாக உரையாடப் போகிறோம். இதுவரை மூன்று வீரர்களையும் இணைத்து ஒன்றாக பயிற்சியளிக்க முடியவில்லை என்பது எங்களுக்குள்ள ஒரு சின்ன வருத்தம். இருந்தாலும் வரும் ஜூலை பயணத்திற்கு நாங்கள் தயாராகவே உள்ளோம்.”

பிலிப்ஸ், “குறிப்பிட்டு சொல்லும்படி வேறு எதுவும் இருக்கிறதா?”

க்ரான்ஸ், “அப்படி எதுவும் இல்லை. அத்தனையும் மேலும் ஒருமுறை சரி பார்க்க திட்டம். இந்த லூனார் மாட்யூலையும்  ஒரு முறை மீண்டும் இயக்கி பார்த்துவிட ஆசைப்படுகிறோம்.”

டேக் ஸ்லேய்டன், “எங்கள் நிலைமையும் ஓரளவுக்கு மற்றவர்களைப் போலத்தான். பதினாறாம் தேதி வரை பயற்சியளிக்க முடிவு செய்யப்பட்டுள்ளது. CSM-LM பயற்சியில்  கொஞ்சம் சமரசம் செய்து கொள்ள வேண்டியிருக்கும். இன்னும் ஒரு நூறு மணி நேரம் கிடைத்தால் நல்லது. ஆனால் அதில் பாதி தான் கிடைக்கும் போல. பரவாயில்லை, அதை வைத்து கூட சமாளித்துக் கொள்வோம். இந்த LLTV (Lunar Landing Training Vehicle – நிலவில் இறங்குவதை உருவகப் படுத்தி பயற்சி பெறுவதற்காக வடிவமைக்கப்பட்ட ஒரு எந்திரம்) பயற்சி பாக்கியிருக்கிறது. நீல் ஆர்ம்ஸ்ட்ராங் (Neil Armstrong) சனி, ஞாயிறு மற்றும் திங்கள் கிழமைகளில் இந்த LLTV’யில் பயற்சி எடுத்துக்கொள்வார். முடிந்தால் செவ்வாயும் மற்றும் அடுத்த வார இறுதியிலும். அப்படி பயற்சியளிக்க முடியாவிட்டாலும் ஓகே தான். ஏனெனில் நீல் இதை ஏற்கனவே இயக்கியிருக்கிறார். அகவே, இந்த பயற்சியை நாம் தாண்டி சென்றுவிடலாம். இந்த பயற்சி தேவையானதே தவிர, அத்தியாவிசயமானது அல்ல. மேலும், பயற்சிகளை இருபத்தியோராம் தேதி வார இறுதியுடன் முடித்துக்கொள்ள விரும்புகிறோம். கடைசி நாள் வரை ஆர்ம்ஸ்ட்ராங்’ஐ பயற்சியில் கட்டிவைக்க விரும்பவில்லை. அவர் ஓய்வு எடுத்துக் கொள்வது நல்லது. மேலும், மற்ற குழுக்களும் அவருடன், ராக்கெட் கிளம்பும்முன் கலந்தாலோசிக்க விரும்புகிறார்கள். அது ஞாயமும் கூட. அதற்கும் நேரம் ஒதுக்க வேண்டும்.”

ஆலோசனைகளின் ஊடே பயிற்சிக்கு தயாராகிக் கொண்டிருக்கும் வீரர்கள்

பிலிப்ஸ், “வீரர்களின் தன்னம்பிக்கை மிக முக்கியம். அவர்களுக்கு நாம் முடிந்தவரை அத்தனை சாத்தியங்களிலும் பயற்சியளித்து விட்டோம் என்று கருதுகிறேன். ஆனாலும், நிலவில் அசாதாரண நேரங்களில் அவர்களின் வேகமான, சமயோசித முடிவுகள்தான் கைகொடுக்கப்போகிறது.”

ஸ்லேடன், “பயற்சியில், வீரர்களின் நிலை அப்போலோ 8’இன் போது இருந்ததைப் போல உள்ளது. அப்போலோ 9’இல் இருந்த பயற்சியை விட ஓகே. ஆனால் அப்போலோ 10 அளவிற்கு இல்லை. இருப்பினும், வீரர்களுக்கு போதிய பயற்சி அளிக்கப் பட்டுள்ளது என்று எனக்கு நம்பிக்கை உள்ளது.”

பயற்சிக்கு தயாராகும் நீல் ஆர்ம்ஸ்ட்ராங்
(முகத்தில் எவ்வளவு மகிழ்ச்சி பாருங்கள்)

ஆனால் உண்மையில் நீல் ஆர்ம்ஸ்ட்ராங், பஸ் ஆல்ட்ரின் மற்றும் மைக்கேல் காலின்ஸ் மூவரும் தங்களுக்கு போதிய அளவு பயிற்சி அளிக்கப்படவில்லை என்று கருதினர். ஆனால் அதை ஸ்லேடனிடம் கூற பயந்தனர். ஆல்ட்ரின் புவியியல் சார்ந்த பயற்சிகளில் இன்னும் அதிக நேரம் செலவிட வேண்டுமென்று ஸ்லேடன் விரும்பினார். உண்மையில், ஆல்ட்ரின் புவியியலை வெறுத்தார், – “எனக்கு பிடிக்காத ஒரு பாடம் புவியியல் – ஒருவேளை, அதனால்தான் அவர்கள் என்னை நிலவில் இறங்க அனுமதிக்கவில்லை போல.”

பிலிப்ஸ், “சரி, இந்த நமது ஜூலை மாத பயணத்தை ஆகஸ்ட் மாதத்திற்கு தள்ளி வைப்பதில் ஏதும் பயன் ஏற்படுமா?”

ஸ்லேடன், “நாம் மேலும் கொஞ்சம் பயற்சி பெறுவோம். ஆனால், உண்மையில் ஆகஸ்ட் மாதம் தள்ளி வைப்பதால் பெரிய பயன் ஒன்றும் இருந்துவிடப் போவதில்லை என்றே தோன்றுகிறது.”

பின் பிலிப்ஸ் ஒவ்வொருவராக கேட்டுக் கொண்டே வந்தார். அதுவரை பேசாத நிர்வாகிகளை பிடித்து தங்கள் கருத்துகளை கூறச் சொன்னார். அனைவரும் ஜூலை மாத ஏவலுக்கு தயாராக இருப்பதாகக் கூறி தங்கள் ஆதரவைத் தெரிவித்தனர். ஒரே ஒரு நிர்வாகி மட்டும், “எனக்கு இப்பொழுதும் கொஞ்சம் சங்கடமாகவே இருக்கிறது.”

லெப்டினன்ட் ஜெனரல்
ஸாமுவேல் ஸி. பிலிப்ஸ்

பிலிப்ஸ் சிரித்தார். “உங்களுக்கு இப்பொழுது தானே? நான் இங்கு வந்ததிலிருந்து, சுமார் ஐந்தரை வருடமாகவே, சங்கடமாகவே உணர்ந்து வருகிறேன்.”

வெளியில் இருந்து இந்த உரையாடல்களைப் பார்க்கும் யாருக்கும் இவர்கள் இன்னும் தயாராகவில்லை என்றே தோன்றும். ஆனால், நாசா ஆட்களைப் பொறுத்த வரையில் வேலை எப்போதும் போல அட்டகாசமாக நடந்து கொண்டிருந்தது. தங்கள் இலக்கை நோக்கி அவர்கள் மெதுவாக ஆனால் உறுதியாக முன்னேறிக் கொண்டிருந்தனர். அன்று, அந்த அறையில் ஒன்றரை மணி நேரத்துக்கு அப்போலோ 11’இன் கடைசி கட்ட திட்டங்களையும் ஏற்பாடுகளையும் பற்றி பலவாறாக விவாதித்தனர். முடிவில், ஜெனரல் பிலிப்ஸ் தன் முடிவைச் சொன்னார்:

“GO”
(தொடர்ந்து…)